Солтүстік Корея жасанды интеллект технологиясы қолданылған «Zam-2.0» атты жаңа жоғары дәлдікті торпеданы сынақтан өткізгенін мәлімдеді.
Су астындағы сынақ 15 қазанда өткен. Солтүстік Кореяның мәліметінше, сынақ торпедалық жүйенің техникалық мүмкіндіктерін жетілдіру нәтижесін тексеру үшін ұйымдастырылған.
«ЦТАК» хабарламасында жаңа жоғары жылдамдықты торпеданың нысаналарды анықтау және оларға бағытталу функцияларында жасанды интеллект технологиясы қолданылғаны айтылған.
Reuters агенттігінің хабарлауынша, сынақ соңғы бес жылда 180-нен астам рет тексерілген қозғалыс технологиясының тиімділігін, сондай-ақ торпеданың зымырандық қозғалтқыш жүйесінің сипаттамаларын растаған.
Пхеньян сынақты сәтті өтті деп бағалап, оны елдің әскери-теңіз күштерін дамытудағы маңызды қадам деп атады. Жұмыстар қару-жарақты жетілдіруге бағытталған қорғаныс зерттеулері аясында жүргізілген.
