Жақсылық Үшкемпіров атындағы «Тараз арена» спорт кешенінде Сыбайлас жемқорлыққа қарсы қызметтің 10 жылдығына орай, Қазақстан Республикасы Сыбайлас жемқорлыққа қарсы іс-қимыл Агенттігі төрағасының Кубогы үшін II Спартакиада «Оңтүстік» тобы қызметкерлері арасындағы іріктеу жарысы өтті.
Іріктеу жарысы спорттың кіші футбол, волейбол, үстел теннисі, арқан тарту, шахмат түрінен ұйымдастырылды. Саламатты өмір салтын насихаттау, спортпен жүйелі түрде айналысуға шақыру, сыбайлас жемқорлыққа қарсы қызмет өкілдері арасында әріптестік қарым-қатынасты нығайту мақсатында ұйымдастырылған жарыста Агенттіктің Шымкент қаласы, Түркістан, Қызылорда және Жамбыл облыстары бойынша департаменттерінің құрама командалары күш сынасты.
Жарыстың ашылу салтанатына Жамбыл облысы әкімінің бірінші орынбасары Н.Календеров, агенттіктің оңтүстік өңірі бойынша аумақтық департаменттерінің басшылық құрамы, спорт жұлдыздары мен қала тұрғындары, бұқаралық ақпарат құралдарының өкілдері қатысты.
Екі күнге созылған іріктеу жарысының нәтижесі бойынша үздік атанған командалар Астана қаласында өтетін республикалық турнирге жолдама алды.
