Тараз қалалық мамандандырылған колледждің ұстаздары облыстық Төтенше жағдайлар департаментінің кадр бөлімінің бас маманы, азаматтық қорғау подполковнигі Назира Ақыловамен кездесу өткізді. Жиналыстың негізгі тақырыбы – төтенше жағдайлар кезінде педагогикалық ұжымның атқаруы тиіс іс-шаралар мен әрекеттер болды.
Кездесу барысында колледж ұстаздары төтенше жағдайлар кезінде қауіпсіздік шараларын ұйымдастыру, эвакуация тәртібі, алғашқы медициналық көмек көрсету және дағдарысқа қарсы іс-қимыл алгоритмдері бойынша тәжірибе алды. Подполковник Назира Ақылова педагогикалық ұжымға нақты мысалдар келтіріп, кез келген төтенше жағдайда сабырлық сақтап, тиімді әрекет ету жолдарын түсіндірді.
«Құтқарушылардың басты міндеті – адамдардың өмірі мен денсаулығын сақтау. Сондықтан төтенше жағдайлар кезінде нақты әрекет ету жоспары болуы қажет», – деген Назира Ақылова сондай-ақ педагогтерді эвакуациялау жолдары, өрт сөндіру құралдарын пайдалану және қауіпті заттарды қауіпсіз басқару тәсілдері бойынша практикалық кеңестермен таныстырды.
Кездесу барысында ұстаздар өз кезегінде тәжірибелік сұрақтар қойып, күнделікті оқу процесінде төтенше жағдайлар кезіндегі әрекеттерді қалай ұйымдастыру керегін талқылады. Мұндай тәжірибе алмасу сабақтары педагогикалық ұжымға адамдардың қауіпсіздігін қамтамасыз етуге, төтенше жағдайларға дайын болуға мүмкіндік береді.
Колледж ұжымы осындай кездесулердің маңыздылығын атап, алынған ақпарат пен дағдыларды өз оқу орнында қолдануға ниет білдірді. Облыстық Төтенше жағдайлар департаменті болашақта да білім беру ұйымдарымен осындай тәжірибе алмасу кездесулерін жүйелі түрде өткізуге ниетті.
