17 мамыр – Дүниежүзілік артериялық гипертониямен күрес күніне орай Сарысу аудандық орталық ауруханасының мамандары Төтенше жағдайлар бөлімінде «Ашық есік күнін» ұйымдастырды. Іс-шараның басты мақсаты – артериялық гипертонияның алдын алу, ауруды ерте анықтау және азаматтардың денсаулыққа деген жауапкершілігін арттыру.
«Ашық есік күні» аясында қатысушыларға бірнеше тексеру жүргізілді. Аурухана мамандары электрокардиограмма (ЭКГ) жасап, әр адамның артериялық қан қысымын өлшеді. Сондай-ақ бойы мен салмағы тіркеліп, дене индексі бойынша кеңестер берілді. Осы шара арқылы әрбір қатысушы өз денсаулығы туралы нақты ақпарат алып, қажет болған жағдайда қосымша медициналық тексеруге жолдама алды.
Психолог маман арнайы тренинг өткізіп, қатысушыларға салауатты өмір салтын сақтау, стресс пен күйзелістің алдын алу жолдары жөнінде кеңестер берді. Тренинг барысында адамдар өз эмоцияларын бақылау, күнделікті өмірде тиімді дем алу әдістерін қолдану, дұрыс тамақтану мен физикалық белсенділікті сақтау сияқты пайдалы дағдыларға үйретілді.
Аурухана мамандары атап өткендей, артериялық гипертония – заманауи қоғамда жиі кездесетін аурулардың бірі. Ол адам ағзасына ұзақ уақыт әсер етіп, ауыр асқынуларға, соның ішінде жүрек-қан тамырлары және бүйрек ауруларына әкелуі мүмкін. Сондықтан мұндай профилактикалық іс-шаралар халық арасында денсаулыққа деген жауапкершілікті арттыруда маңызды рөл атқарады.
Іс-шараға келген тұрғындар өз пікірлерін білдіріп, мұндай шаралардың пайдалы екенін атап өтті. Көпшілігі дәрігерлердің кеңестерін тыңдап, өздерінің денсаулығына ерекше назар аудару керегін түсінді. Мамандар мұндай «Ашық есік күндерін» жүйелі түрде өткізу арқылы артериялық гипертонияның алдын алу мүмкіндігін арттыруға болатынын айтты.
Сарысу аудандық орталық ауруханасының ұйымдастыруымен өткен бұл іс-шара тұрғындардың денсаулығын бақылауға алу мен салауатты өмір салтын насихаттауға бағытталған маңызды қадам болып отыр.
