Талас ауданында оқушыларға арналған «Ашық есік күні» ұйымдастырылып, жасөспірімдер құтқарушылардың қызметімен жақынырақ танысуға мүмкіндік алды. Танымдық іс-шара Ахмет Байтұрсынұлы атындағы гимназия оқушыларының қатысуымен №12 өрт сөндіру бөлімінде өтті.
Кездесу барысында төтенше жағдайлар бөлімінің мамандары өрт сөндірушілердің күнделікті атқаратын жұмысы, олардың жауапкершілігі мен қызмет барысындағы қиындықтары туралы кеңінен әңгімеледі. Оқушылар арнайы техника мен заманауи құрал-жабдықтарды көріп, олардың қалай қолданылатыны жөнінде мәлімет алды.
Іс-шара аясында өрт қауіпсіздігі ережелеріне ерекше назар аударылды. Мамандар балаларға өрт шыққан жағдайда дұрыс әрекет ету жолдарын түсіндіріп, қауіптің алдын алу шаралары жөнінде кеңес берді. Сонымен қатар оқушыларға төтенше жағдай кезінде сабыр сақтап, арнайы қызмет нөмірлеріне дер кезінде хабарласудың маңызы айтылды.
Іс-шараның тәжірибелік бөлігінде өрт сөндіру автокөліктерінің мүмкіндіктері көрсетіліп, арнайы техникалардың жұмыс істеу ерекшеліктері таныстырылды. Оқушылар құтқарушылардың арнайы киімдері мен жабдықтарына қызығушылық танытып, мамандарға өз сұрақтарын қойды.
Мұндай кездесулер жас ұрпақтың қауіпсіздік мәдениетін қалыптастырып қана қоймай, олардың құтқарушы мамандығына деген қызығушылығын арттыруға да ықпал етеді.
