Талас ауданының орталығы саналатын Қаратау қаласы соңғы жылдары әлеуметтік-экономикалық даму бағытында серпінді өзгерістерге бет бұрып келеді. Кезінде өндірісімен танылған шаһар бүгінде инфрақұрылымды жаңғырту, тұрғындардың тұрмыс сапасын жақсарту және инвестициялық жобаларды жүзеге асыру арқылы жаңа даму кезеңіне қадам басуда.
1963 жылы іргесі қаланған қалада қазіргі таңда 28 мыңнан астам халық тұрады. Қала әкімі Дархан Баймбетовтың айтуынша, тұрғындарға қолайлы орта қалыптастыру бағытында жүйелі жұмыстар атқарылуда.
Бүгінде Қаратаудағы 130 көшенің басым бөлігі асфальтталып, жол сапасы кезең-кезеңімен жақсарып келеді. Қазіргі таңда көшелердің 80 пайыздан астамы жөнделген. Ал қалған көшелерге орташа жөндеу жұмыстарын жүргізу алдағы жылдарға жоспарланған. Сонымен қатар шаһардағы аулалар мен негізгі көшелерді жарықтандыру мәселесі де назардан тыс қалмаған.
Қала халқы толықтай ауызсумен қамтылған. Ал табиғи газбен қамту көрсеткіші 90 пайыздан асқан. Бұдан бөлек, коммуналдық инфрақұрылымды жаңғырту жұмыстары да кезең-кезеңімен жүзеге асырылуда. Соның ішінде кәріз жүйелерін тазарту имаратын салу жобасы алдағы екі жылда іске асырылмақ. Жылу желілерін жаңарту бағытында да ауқымды жұмыстар қолға алынған. Өткен жылы тозығы жеткен жылу құбырларын ауыстыруға қомақты қаржы бөлініп, күрделі жөндеу жұмыстары жүргізілген.
Қаратауда тұрғын үй мәселесін шешуге де айрықша көңіл бөлініп отыр. Қазіргі таңда қалада 150-ден астам көпқабатты тұрғын үй бар. Соңғы жылдары бірнеше тұрғын үй қайта жаңғыртылып, баспана кезегінде тұрған азаматтарға пәтер кілттері табысталған. Биыл да жүздеген тұрғынды баспанамен қамту жоспарланып отыр. Әсіресе көпбалалы және әлеуметтік осал топтағы азаматтарға басымдық берілуде.
Әлеуметтік салада да оң өзгерістер байқалады. Өткен жылы аудан бойынша мыңнан астам азамат жұмыспен қамтылып, бірқатар тұрғын қайтарымсыз мемлекеттік грант иегері атанған. Сонымен қатар жастар мен тұрғындардың спортпен тұрақты айналысуына жағдай жасау бағытында жүйелі жұмыстар жүргізілуде. Қаладағы спорт мектептері мен спорт нысандары тұрғындарға қолжетімді.
Шаһар тазалығы мен абаттандыру мәселесі де күн тәртібінен түскен емес. Қала аумағында арық жүйелері тазартылып, қоқыс шығару жұмыстары тұрақты жүргізілуде. Соңғы жылдары аулаларға балалар ойын алаңшалары мен шағын футбол алаңдары орнатылып, тұрғындарға қолайлы қоғамдық кеңістіктер қалыптасып келеді.
Қаратау қаласында көгалдандыру жұмыстары да қарқын алған. «Жасыл белдеу» жобасы аясында мыңдаған көшет отырғызылып, саябақтар мен аллеялар жаңартылуда. Жасыл желектерді күтіп-баптау үшін арнайы суару жүйелері іске қосылған.
Қоғамдық қауіпсіздікті қамтамасыз ету мақсатында қала көшелеріне бейнебақылау камералары орнатылып, жол қозғалысын реттеу бағытында жаңа бағдаршамдар қойылған. Мектеп маңындағы қауіпсіздік шаралары да күшейтілген.
Өнеркәсіп саласында да ілгерілеу бар. Қалада химия өндірісі бағытындағы жаңа жоба іске қосылып, ондаған адам тұрақты жұмыспен қамтылған. Жоба аясында өндірілетін өнім көлемін арттыру жоспарланып отыр.
Қаратау бүгінде тек өндірістік шаһар ғана емес, тұрғындарға жайлы орта қалыптастыруға ұмтылған өңірлік орталыққа айналып келеді. Инфрақұрылымдық жобалар, әлеуметтік бастамалар мен өндірістегі серпін – қаланың болашақ даму бағытының айқын көрінісі.
