Мобильдік роботехника құзыреттілігі бойынша «WorldSkills Jambyl-2022» облыстық чемпионатында командалық сайыста өнер көрсеткен колледжіміздің студенттері 2 Аиу 20-1 тобындағы А.Құлыбай мен 2 ОРТ 20-2 тобындағы Л.Колпаков жүлделі бірінші орын иегерлері атанып, республикалық «WorldSkills Kazakhstan-2022» чемпионатына жолдама ұтып алды. Оларға екі жылдан бері роботехниканың қыр-сырларын үйретіп, жетекшілік етіп келе жатқан ұстаз ретінде бұл жетістік мен үшін де үлкен қуаныш. Студенттерімізбен бірге колледжаралық, қалалық, облыстық чемпионаттарға қатысып, жүлделі орындарды бағындырып келеміз.
Бұл жетістікте еліміздің еңбек нарығындағы қалыптасып отырған жағдай туралы нақты мәліметтер алу, қазіргі кезде және болашақта мамандықтар мен түлектерге қажеттіліктерді талдау мақсатында серіктестерімізбен бірлесіп жүргізілген зерттеулер негізінде Жамбыл политехникалық жоғары колледжіне сатып алынған техникалардың арасында біздің «Автоматтандыру және басқару» мамандығы үшін арнайы жеткізілген «Робототехника» жабдықтарының рөлі зор болғанын айта кеткім келеді. Оның ішінде «Мобильдік роботехника WorldSkills 2022» чемпионатына арналған канадалық ең жаңа «Studica Robotics» роботы да бар.
Бүгінгі күні колледжде салалық кооперация негізінде техникалық мамандықтар бойынша инновациялық оқу-әдістемелік материалдарды біріктіру бойынша жұмыс жүргізілуде. Білім беру бағдарламаларын кәсіби стандарттарға және ТиППО классификаторына сәйкес түзету жұмыстары жалғасуда. Осыған орай жастарды техника мен технологияға бет бұрып, роботехниканы меңгеріп, WorldSkills ұлттық чемпионатына қатысуға шақырамыз.
