Аустралиядағы Эдит Коуэн университетінің ғалымдары сиыр сүтіне қарағанда түйе сүтінде ішекте сау орта жасайтын биоактивті пептидтер көп екенін анықтады. Сондай-ақ түйе сүті аллергия тудырмайды. Зерттеу нәтижелері «Food Chemistry» журналында жарияланды.
Зерттеушілер сиыр мен түйе сүтіне терең талдау жүргізіп, иммундық функция мен асқорытуға әсер ететін ақуыздарға ерекше назар аударды. Нәтижелер түйе сүтінде денсаулықты қолдайтын ақуыздар көп екенін көрсетті. Түйе сүтінің кілегейінен 1143 ақуыз табылды, ал дәстүрлі сиыр сүтінің өнімінде 851 ақуыз болды.
Ғалымдар белгілі бір жасушалық метаболикалық процестерді бастау арқылы адам денсаулығына оң әсер ететін биоактивті пептидтерге — аминқышқылдарының молекулаларына ерекше назар аударды. «Бұл биоактивті пептидтер белгілі бір патогендерді селективті түрде тежеп, сау ішек микрофлорасын сақтай алады, бұл жүрек-қан тамырлары ауруларының қаупін азайтуы мүмкін», деп түсіндірді зерттеу авторларының бірі Мануджая Джаяманна Мохиттидж.
Ғалымдар түйе сүтінде β-лактоглобулин жоқ екенін алға тартты, бұл оны сиыр сүтіне аллергиясы бар адамдар үшін жақсы балама етеді. Оған қоса, түйе сүтіндегі лактоза деңгейі де төмен.
Сиыр сүті әлемдік өндірістің 81 пайызын алады, ал түйе сүті тек бесінші орында, жалпы көлемнің 0,4 пайызын ғана алады.
