Жамбыл облысында су шаруашылығы жүйелерін жаңғырту және оларды апатты жағдайларға төзімді ету бағытында ауқымды жұмыстар жүргізілуде. ҚР Төтенше жағдайлар министрлігінің «Селденқорғау Құрылыс» мамандары Тараз қаласы мен Шу ауданында су инфрақұрылымын қалпына келтіру, реконструкциялау және күрделі жөндеу жобаларын іске асырып жатыр.
Жобаның негізгі мақсаты – өңірдегі су шаруашылығы жүйелерінің техникалық жағдайын жақсартып, олардың жоғары жүктеме кезеңдерінде де үздіксіз әрі қауіпсіз жұмыс істеуін қамтамасыз ету. Бұл әсіресе көктемгі қар еріген кезеңде және нөсер жауын-шашын кезінде су тасқыны қаупін азайтуға мүмкіндік береді.
Мамандардың айтуынша, жүргізіліп жатқан жөндеу жұмыстары тек қолданыстағы инфрақұрылымды қалпына келтірумен шектелмейді. Сонымен қатар гидротехникалық нысандардың өткізу қабілетін арттыру, су бұру арналарының тиімділігін күшейту және тозған учаскелерді толық жаңарту қарастырылған.
Тараз қаласы мен Шу ауданында атқарылып жатқан бұл шаралар аймақтың су қауіпсіздігін қамтамасыз етудегі маңызды қадамдардың бірі болып отыр. Жаңғыртылған жүйелер су тасқынының алдын алуға ғана емес, сонымен қатар су ресурстарын тиімді пайдалануға да ықпал етеді.
Жобаның іске асырылуы өңір тұрғындарының қауіпсіздігін арттырып, инфрақұрылымның ұзақ мерзімді тұрақтылығын қамтамасыз етпек. Бұл бағыттағы жұмыстар алдағы уақытта да кезең-кезеңімен жалғасын табады.
