Тараз қаласында 2025 жылдың 31 желтоқсанында орын алған төтенше жағдайдан кейін, облыс әкімі Ербол Қарашөкеев зардап шеккен тұрғындарды қолдау және қалпына келтіру жұмыстарын бақылау мақсатында №15 көпқабатты үйге арнайы барды.
– Өрттің шығу ошағын және себебін анықтау үшін арнайы комиссия құрылды. Сонымен қатар, әр пәтер бойынша келтірілген шығын есептеліп, қалпына келтіру жұмыстары жүргізіледі. Зардап шеккен тұрғындарға барлық қажетті көмек көрсетілетін болады, – деді Ербол Қарашөкеев.
Оқиға 31 желтоқсан күні кешкі сағат 22:18-де орын алған болатын. Тұрғын үйдің балконынан басталған өрт тез арада шатырға тараған. Төтенше жағдайлар департаменті өртті сөндіру жұмыстарына 62 адам мен 22 техника жұмылдырды. Өрт сағат 00:13-те толық сөндірілгенімен, 100 адам, оның ішінде 30 бала эвакуацияланды. Қуаныштысы, зардап шеккендер жоқ.
Қазіргі таңда мердігерлер шатырдың жабындыларын алып, жөндеу жұмыстарын бастады. Пәтерлерді қалпына келтіру жұмыстары комиссияның нақтылау шараларынан кейін қолға алынады. Ербол Қарашөкеев өз сөзінде тұрғындарды сабырлы болуға, сақтық шараларын қатаң сақтауға шақырды.
– Комиссияның жұмысына тұрғындарды да тарту қажет. Бұл жұмыс барлық тараптардың келісімімен жүргізілуі тиіс, – деп атап өтті өңір басшысы.
Өрттен зардап шеккен тұрғындардың бірқатары қонақүйге орналастырылды. Қазіргі уақытта Ербол Қарашөкеевтің тапсырмасымен облыс әкімінің орынбасары Алтай Әлі мен Тараз қаласының әкімі Бақытжан Орынбеков оқиға орнында жұмыс істеуде.
Тараз қаласының тұрғындары мен төтенше жағдайларға қатысты жауапты органдар жағдайды бақылауда ұстап, барлық қалпына келтіру шаралары өз уақытында жүзеге асырылады деп сендірді облыс басшылығы.
