Жамбыл облысының әкімі Ербол Қарашөкеев «AMANAT» партиясы депутаттық фракциясының кеңейтілген отырысына қатысып, өңірдің әлеуметтік-экономикалық даму барысы мен жылдың алдын ала қорытындылары туралы баяндама жасады.
Жиында «AMANAT» партиясының Жамбыл облысы бойынша сайлауалды бағдарламасын іске асыруға арналған Жол картасының орындалу барысы, сондай-ақ игерілмеген және заңсыз пайдалануға берілген жайылым жерлерін мемлекет меншігіне қайтару, оларды қайта айналымға енгізу мәселелері қаралды.
Аймақ басшысы 2025 жылдың 11 айында экономикалық өсіс 9,4 пайызды құрағанын атап өтті. Атап айтқанда, өнеркәсіп көлемі – 16 пайызға, ауылшаруашылығы – 1,4 пайызға, құрылыс – 20,4 пайызға, тұрғын үй – 1,1 пайызға, сауда – 0,2 пайызға, көлік – 2,9 пайызға, байланыс – 9,5 пайызға, инвестиция 33,1 пайызға артты.
Жыл басынан бері 1,2 триллион теңгенің өнеркәсіп өнімі өндіріліп, салаға 203,8 миллиард теңге инвестиция тартылды. Өңдеу өнеркәсібінің экспорты 1,5 есеге ұлғайып, облыс республика бойынша көш бастады. 599,2 миллиард теңге инвестиция тартылып, өңір еліміз бойынша үздік үштіктен көрінді. Инвестициялық қоржында 2029 жылға дейін іске асырылатын жалпы құны 4,1 триллион теңгені құрайтын 62 жоба бар. Оның 12-сі шетелдік инвесторлардың қатысуымен жүзеге асырылады. Аталған жобалар аясында 8,3 мың жұмыс орны ашылады. 2025 жылы 161 миллиард теңгеге 26 жоба іске асырылып, 1,1 мың адам жұмыспен қамтылады. Бүгінгі күнге дейін 27,5 миллиард теңгенің 21 жобасы жүзеге асырылып, 550 жұмыс орны құрылды.
Өңірде жұмыс істеп тұрған шағын және орта бизнес субъектілерінің саны 109,9 мыңға жетіп, бұл салада 165,4 мың адам еңбек етуде. Мемлекеттік қолдау аясында жалпы құны 52,1 миллиард теңгені құрайтын 1218 жобаға қолдау көрсетіліп, нәтижесінде ШОБ өндірген өнім көлемі 18,1 пайызға артты.
Ауылшаруашылығы саласында 485,4 миллиард теңгенің өнімі өндірілді. Егістік алқабы 640 мың гектарға жетіп, 3,3 миллион тонна өнім жиналды. Оның ішінде 221 мың тонна қант қызылшасы бар. Сонымен қатар, 858 бірлік ауылшаруашылығы техникасы сатып алынып, жаңғырту деңгейі 6,3 пайызды құрады. Мал шаруашылығында ет өндірісі 2,2 пайызға, сүт көлемі 1,7 пайызға артты. Сондай-ақ 410 мың тонна пияз экспортталып, облыс республикада көш бастады.
«Ауыл аманаты» бағдарламасы аясында 3,2 миллиард теңгеге 437 жоба қаржыландырылды. Су үнемдеу технологиялары 66,5 мың гектар егіс алқабына енгізілді.
Тұрғын үй құрылысы бағытында 642,6 мың шаршы метр баспана пайдалануға берілді. Қазіргі таңда 2190 пәтерлі 46 тұрғын үйдің құрылысы жүргізілуде. Оның ішінде 580 пәтерлі 11 әлеуметтік үй пайдалануға берілсе, жыл соңына дейін тағы 9 үйдің құрылысы аяқталады. Бұдан бөлек, көпбалалы және әлеуметтік осал топтағы отбасылар үшін 710 пәтер сатып алу жоспарланған. «Әулиеата жастары» бағдарламасы арқылы 140 жас отбасы баспаналы болды.
Мемлекет басшысының тапсырмасына сәйкес 24 ауылдық елді мекен мен 9 тұрғын алқап ауызсумен қамтылады. Газдандыру бағытында 20,5 миллиард теңгеге 14 жоба іске асырылып, газбен қамту деңгейі 91,8 пайызға жетеді.
Жол инфрақұрылымын дамыту аясында 460,2 шақырым жол құрылыс, қайта жаңғырту және жөндеу жұмыстарымен қамтылды. Нәтижесінде жергілікті маңызы бар автожолдардың жақсы және қанағаттанарлық жағдайдағы үлесі 99,5 пайызға, ал көше-жол желісі 89 пайызға жеткізіледі.
Жұмыспен қамту саласында Президенттің «10 мың тұрғынға 100 жаңа жұмыс орнын құру» тапсырмасы артығымен орындалып, 18,3 мыңнан астам жұмыс орны ашылды. Өңірлік жұмыспен қамту картасы аясында 63,4 мың жұмыс орны құрылса, оның 46,2 мыңы тұрақты жұмыс орындары.
Білім беру саласында 26 нысанның құрылысы жүргізілуде. Жыл басынан бері 10 мектеп пайдалануға берілді, жыл соңына дейін тағы 3 нысан қолданысқа тапсырылады. Нәтижесінде үш ауысымды, орын тапшылығы мен тозығы жеткен мектептердің мәселесі кезең-кезеңімен шешілуде. Сонымен қатар, 16 білім беру нысаны күрделі жөндеуден өтті.
Денсаулық сақтау саласында 5 нысанның құрылысы жүргізіліп, оның үшеуі ел игілігіне берілді. 11 нысан күрделі жөндеуден өтіп, 32 бірлік медициналық құрал-жабдық сатып алынды. Саладағы инфрақұрылымның тозу деңгейі 42 пайызға дейін төмендеді.
Спорт саласында 21 спорт кешенінің құрылысы жүріп жатыр. Сонымен қатар 3 спорт кешені мен 90 спорт алаңы пайдалануға берілді. Мәдениет саласында 16 нысанның құрылысы қолға алынып, оның 10-ы ел игілігіне тапсырылды.
Жиын барысында депутаттар тарапынан қойылған сауалдарға жан-жақты жауап берілді.
