Облыстық айтыскер ақындар, жыршы-термешілер орталығында үйірме қатысушыларының ұйымдастыруымен Қазақстан Республикасының Тәуелсіздік күніне орай «Тәуелсіздік тұғырым» атты әдеби-сазды кеш өтті
Көрермендерге әсерлі әдеби шығармалар, патриоттық әндер мен «Қайым айтыс» түрінде ұсынылған кешті Мәдениет саласының үздігі, «Еңбек ардагері» медалінің иегері Ербол Қамбатыров ашып, тәуелсіздік тарихына қысқаша тоқталды. Одан әрі 3-сынып оқушысы, кішкентай үйірме қатысушысы Сұлтанхан Айша жалғастырып, патриоттық баяндаманы жатқа оқыды. Оның жалғасында Сұлтанхан Даниял мен Алишев Мансұрдың айтысы көрермендерді тәнті етті.
Кештің шырайын Інжу Жаңабай мен Қамбар Жанерке орындаған «Желтоқсан желі» және «Балапан қаз» әндері аша түсті. Соңында Інжу Жаңабай мен Жамалбек Мирастың әсерлі айтысы көрермендердің көңілінен шығып, әдеби-сазды кешті жоғары деңгейде қорытындылады.
Іс-шара барысында тәуелсіздіктің маңызын насихаттайтын өлеңдер оқылып, қазақ халқының бай тарихы мен мәдениеті дәріптелді. Кеш көрермендердің жүрегінде терең әсер қалдырды.
