Ағымдағы жылдың 7 шілдесінде Сарысу ауданы аумағында қатты жауын-шашын салдарынан көлбеу ағын қалыптасып, 400 аула, 56 үй мен бір мектептің жертөлесін су басқан болатын. Бүгінде қалпына келтіру жұмыстары толық аяқталды.
Залалды бағалау жөніндегі 4 арнайы комиссия құрылды. Үш тұрғын үй жарамсыз деп танылып, нәтижесінде бір үйдің құрылысы жүргізіліп, екі отбасыға баспана сатып алынды. Ал, 53 үй жөндеуден өтті. 63 тұрмыстық техника мен жиһаздың зақымдалғаны анықталды. Шығын көлемі 4,8 млн. теңгені құрайды. 600 үй мен ауласы дезинфекцияланды. 9 жарық бағанасы реттеліп, жаңадан бесеуі орнатылды. Бұдан бөлек, бүлінген жолдарды жөндеу жұмыстары жүргізілді. Бірқатар көше арық және дренаж жүйесімен жабдықталды.
Жамбыл облысының әкімі Ербол Қарашөкеев Сарысу ауданына жұмыс сапары аясында Жаңатас қаласында орын алған төтенше жағдай зардаптарын жою бойынша атқарылған жұмыстарды көрді. Ербол Қарашөкеев жаңатастықтардың хал-ахуалын көріп, қалпына келтіру жұмыстары бойынша пікірлерін тыңдады.
– Басымызға іс түскенде қолдауды сезіндік. Уәде етілген уақытта баспанаға ие болып отырмыз. Алғыстан басқа айтарымыз жоқ, – деді жаңатастық Смағұловтар отбасы.
Құрылыстың басы-қасында жүріп, жаңа баспанға ие болған ақ жаулықты ана Айткүл Құлжабайқызы батасын жаудырып, ел мен жердің амандығын тіледі.
Сондай-ақ, биыл Жаңатас қаласындағы 12 көпқабатты тұрғын үйге күрделі жөндеу, жаңғырту жұмыстары жүргізілуде. Ербол Қарашөкеев құрылыс барысымен танысып, баспаналарды жаңғырту кезінде сапаға баса мән бере отырып, тұрғындар тілегін назарға алуды ескертті.
Бұдан соң қаланың жылыту маусымына дайындығын тексеру мақсатында орталық қазандыққа барды. Бүгінде қазандықты газдандыру жобасының құрылыс-монтаж жұмыстары аяқталды. 4 дана Bosch су қыздыру қазандығы, 1 дана Bosch бу қазандығы орнатылды. Сонымен бірге желілік сорғылар мен түтін құбыры толығымен жаңартылды.
Облыс әкімі тарихы терең «Саудакент» қалашығымен танысып, аудандағы жұмыс сапарын түйіндеді.
