ХХХlll жазғы Олимпиада ойындарының чемпионы Елдос Сметов елге оралды. Ел мерейін асқақтатқан спортшыны жүздеген жамбылдық жанкүйерлері Халықаралық Алматы әуежайынан күтіп алып, ерекше құрмет көрсетті.
Әуежайға спорт саңлағының ата-анасы, туған-туыстары, спорт ардагерлері, спортшылар мен бапкерлер, белсенді жастар зор қуаныш, құшақ-құшақ гүл шоқтарымен күтіп алды.
Өз кезегінде Елдос Сметов қолдау көрсетіп, ыстық ықылас танытқан барша қазақстандықтар мен жанкүйерлеріне ризашылығын білдірді.
Айта кетейік, Елдос Сметов Париж (Франция) қаласында өтіп жатқан төртжылдықтың басты додасында жеңіс тұғырынан көрініп, ел тарихында дзюдодан Олимпиаданың тұңғыш чемпионы атанған болатын.
