Байзақ ауданы әкімдігі ішкі саясат бөлімі «Жастар ресурстық орталығы» коммуналдық мемлекеттік мекемесінің ұйымдастыруымен өтіп жатқан «IQJASTAR» интеллектуалды ойынының финалдық кезеңі өз мәресіне жетті.
Интеллектуалды-зияткерлік ойынның басты мақсаты – интеллектуалды ортаны қалыптастыру, түрлі мекеме қызметкерлері, жастар және аудан тұрғындары арасында білімге құштарлықты арттыру, бос уақытты тиімді пайдалану, командада жұмыс жасау арқылы мәселені талқылау қабілетін дамыту, яғни, елімізде зияткер буын өкілдерін қалыптастыруға үлес қосу болып табылады.
13 команданың қатысуымен өткен ойын 6 турдан құралған. Әр турда лэд экран арқылы жеті сұрақ қойылып, әр сұрақтың жауабын ойлануға 30 секундтан берілді. Сайысқа қатысушылар «Сәлем беру», «Ата дәстүр, ғұрып», «Мәдени майдан», «Қара жәшік», «Fashion (Фэшн)», «Файл Х» атауымен аталған турлар бойынша өзара кім мықтыны анықтады.
Аса тартысты да қызықты сәттерге толы сайыс қорытындысында 97 ұпай жинаған «SQ ИНТЕЛЛЕКТ» командасы бірінші орынға шықты. Ал, 86 ұпай жинақтаған «GM JASTARY» командасы жүлделі екінші орынға ие болса, 83 ұпаймен «DREAM TEAM» командасына үшінші орын бұйырды.
Аудан әкімінің орынбасары Рүстем Қасымов жеңімпаздарды марапаттап, диплом, кубок, ақшалай сертификат және заттай сыйлықтарды табыс етті. Басқа да қатысушы командаларға Алғысхаттар мен сыйлықтар табысталды.
