Биыл Тараз қаласы мен аудандарда 34 заманауи спорт алаңшасы пайдалануға беріледі. Бұл туралы облыс әкімі Ербол Қарашөкеевтің төрағалығымен өткен, бұқаралық спортты дамыту шаралары қаралған аппараттық кеңесте айтылды.
– Биыл өңірде бұқаралық спортты дамыту үшін бюджеттен 418,5 млн теңге қарастырылып отыр, – деді аталған мәселе бойынша есеп берген дене шынықтыру және спорт басқармасының басшысы Ернар Ибраимов.
Оның айтуынша, І жартыжылдық қорытындысы бойынша облыста дене шынықтырумен және спортпен жүйелі түрде шұғылданушылар қатары 496 мың адамға жеткен. Бұқаралық спорттың дамуына тың серпін беру мақсатында облыстағы 153 ауылдық округ толықтай спорт нұсқаушыларымен қамтылған. Жалпы, өңірде 303 спорт нұсқаушысы бар, оның 250-і аудандарда еңбек етіп жүр. Өткен жылмен салыстырғанда спорт нұсқаушыларының саны 23 адамға өскен.
– Шалғай елді мекендерде ұйымдастырылатын спорттық іс-шаралардың саны ұлғайып, сапасы артып, қатысушылардың қатары көбейді. Спорт нұсқаушыларының жұмысы бұқаралық спорттың дамуына ықпалын тигізіп отыр, – деді басқарма басшысы.
Жалпы, жыл басынан бері саламатты өмір салтын насихаттау мақсатында 2300-ден астам спорттық іс-шара ұйымдастырылып, оған 190 мың адам атсалысыпты. 4-17 жас аралығындағы балалар мен жасөспірімдер 17 спорт түрі бойынша спорттық секцияларға тегін қатысуда.
Өңірде спорт нысандары бой көтеріп, ел игілігіне беріліп келеді. Бүгінде 15 спорт кешенінің құрылысы жүргізіліп жатыр. Оның 14-і биыл, қалған біреуі 2025 жылы пайдалануға беріледі деп күтілуде. Бұдан бөлек, Тараз қаласы мен аудандарда 34 заманауи спорт алаңшасы қолданысқа беріледі.
Тараз қаласы мен Т.Рысқұлов, Қордай, Байзақ аудандарында балалар мен жасөспірімдерге арналған дене шынықтыру даярлық клубы бар. Ағымдағы жылы мұндай клубтар Жамбыл, Жуалы, Меркі аудандарында ашылады деп күтілуде.
Соңғы мәліметтерге сәйкес халықты спорттық инфрақұрылыммен қамтамасыз ету деңгейі 64,9 пайызды құрап отыр. Жыл қорытындысы бойынша бұл көрсеткішті 66 пайызға арттыру жоспарлануда.
– Басқарма құрылысы жүріп жатқан және қолданыстағы спорт нысандарына жүйелі түрде зерделеу жұмыстарын жүргізуі керек. Барлық жаңа нысандар мерзімінде әрі сапалы тапсырылуы тиіс. Қазір мектеп оқушылары жазғы демалыстарын өткізуде. Олардың бос уақыттары жеткілікті. Балалардың спорт нысандарына барып, үйірмелерге қатысуына жол ашуымыз маңызды, – деді Ербол Қарашөкеев.
Басқосу барысында аудан әкімдері бұқаралық спортты дамыту бағытында атқарылған жұмыстар мен жоспарлары туралы баяндады.
Жиын қорытындысы бойынша облыс әкімі спорт алаңшаларына қайта түгендеу жұмыстарын жүргізіп, бір апта ішінде қажеттілікті нақтылауды тапсырды.
