Көшелер жасыл желекпен көмкерілуде

0 28

Биыл Тараз қаласын көгалдандыруға айрықша ден қойылып отыр. Бұл жұмыстардың бір парасы шөп шабуға бағытталған. Осы мақсатта ағымдағы жылы 5448000 шаршы метр жасыл желекті қырқу көзделсе, оның ішінде 350000 шаршы метр бүгінде толығымен атқарылған.

Мәселен, қазірге дейін Абай, Төле би, әл-Фараби көшелері, облыстық және қалалық әкімдіктердің маңы және шаһардағы саябақтар мен скверлердің барлығында дерлік шөп шабу жұмыстары жүргізілді.

Сонымен қатар қалада жасыл жамылғыларды (газон) төсеу жұмыстары да қарқынды. Айталық, бүгінде Ы.Дүкенұлы атындағы қалалық мәдениет үйінің маңы жасыл жамылғылармен көмкерілді. Енді таяуда Абай, Төле би, Саңырық батыр, Әйтиев көшелеріне, «Ұлы дала» ықшам ауданына және «Тектұрмас» этно-тарихи кешеніне жасыл жамылғылар төселеді.

Биыл шаһар бойынша 22300 шаршы метр жасыл жамылғы отырғызу жоспарланса, бүгінге оның 4000 шаршы метр төселді.

Жалпы, қала ішіндегі жасыл желекті суару мәселесі өте өзекті. Қазір «Жасыл ел-Тараз» мекемесі шаһардағы суару жүйелерін қалпына келтіріп, жаңадан жасыл жамылғы егілген аймақтарға арнайы су жүйелерін тартуда.